ಬೇಸಿಗೆಯಲ್ಲಿ ತುಳಸಿ ಗಿಡ ಉಳಿಸೋದು ಹೇಗೆ? ಇಲ್ಲಿದೆ ಟಿಪ್ಸ್

ಲೈಫ್ ಸ್ಟೈಲ್ 1 day ago ಬೆಂಗಳೂರು ನಗರ

ಬೆಂಗಳೂರು: ತುಳಸಿ ಗಿಡವು ಮನೆಗಳಲ್ಲಿ ಧಾರ್ಮಿಕ ಹಾಗೂ ಔಷಧೀಯ ಮಹತ್ವ ಹೊಂದಿರುವ ಪ್ರಮುಖ ಸಸ್ಯವಾಗಿದ್ದು, ಬೇಸಿಗೆಯ ತೀವ್ರ ಬಿಸಿಲಿನಲ್ಲಿ ಇದರ ಆರೈಕೆಗೆ ವಿಶೇಷ ಗಮನ ಅಗತ್ಯವಿದೆ ಎಂದು ತೋಟಗಾರಿಕೆ ತಜ್ಞರು ತಿಳಿಸಿದ್ದಾರೆ. ಉರಿ ಬಿಸಿಲಿನ ಪರಿಣಾಮವಾಗಿ ತುಳಸಿ ಗಿಡ ಬೇಗನೆ ಒಣಗುವ ಸಾಧ್ಯತೆ ಇರುವುದರಿಂದ ಸರಿಯಾದ ಕ್ರಮಗಳನ್ನು ಪಾಲಿಸುವುದು ಅವಶ್ಯಕವಾಗಿದೆ.

ಬೇಸಿಗೆಯಲ್ಲಿ ತುಳಸಿ ಗಿಡಕ್ಕೆ ಬೆಳಿಗ್ಗೆ ಅಥವಾ ಸಂಜೆ ವೇಳೆಯಲ್ಲಿ ಮಾತ್ರ ನೀರು ಹಾಕುವುದು ಉತ್ತಮ. ಅತಿಯಾಗಿ ನೀರು ಹಾಕಿದರೆ ಬೇರುಗಳಿಗೆ ಹಾನಿಯಾಗುವ ಸಾಧ್ಯತೆ ಇರುವುದರಿಂದ ಮಿತವಾಗಿ ನೀರುಣಿಸಬೇಕು. ಗಿಡ ಹಸಿರಾಗಿರಲು ಕಾಲಕಾಲಕ್ಕೆ ಸಾವಯವ ಗೊಬ್ಬರ ಬಳಕೆ ಮಾಡುವುದು ಮುಖ್ಯ. ಹಸುವಿನ ಸಗಣಿ ಅಥವಾ ವರ್ಮಿಕಾಂಪೋಸ್ಟ್ ಬಳಕೆ ಮಣ್ಣಿನ ಫಲವತ್ತತೆಯನ್ನು ಹೆಚ್ಚಿಸಿ ಗಿಡದ ಬೆಳವಣಿಗೆಗೆ ಸಹಕಾರಿಯಾಗುತ್ತದೆ.

ಕೀಟಗಳ ಸಮಸ್ಯೆಯನ್ನು ತಪ್ಪಿಸಲು ಬೇವಿನ ನೀರು ಅಥವಾ ಬೇವಿನ ಎಣ್ಣೆ ಸಿಂಪಡಿಸುವುದು ಸಹ ಉಪಯುಕ್ತವಾಗಿದೆ. ತುಳಸಿ ಗಿಡಕ್ಕೆ ಅಗತ್ಯ ಪೋಷಕಾಂಶಗಳನ್ನು ಒದಗಿಸಲು ತಿಂಗಳಿಗೊಮ್ಮೆ ಅಕ್ಕಿ ನೀರು ಅಥವಾ ಮಜ್ಜಿಗೆ ಹಾಕುವುದು ಉತ್ತಮ. ಜೊತೆಗೆ ಬಾಳೆಹಣ್ಣಿನ ಸಿಪ್ಪೆ ಪುಡಿ ಮಣ್ಣಿನಲ್ಲಿ ಬೆರೆಸುವುದರಿಂದ ಗಿಡ ಇನ್ನಷ್ಟು ಬಲವಾಗುತ್ತದೆ.

ಮಣ್ಣು ಗಟ್ಟಿಯಾಗದಂತೆ ಕಾಲಕಾಲಕ್ಕೆ ಸಡಿಲಗೊಳಿಸುವುದು ಬೇರುಗಳಿಗೆ ಗಾಳಿ ಹಾಗೂ ನೀರಿನ ಸರಿಯಾದ ಹರಿವು ನೀಡುತ್ತದೆ. ಬೇಸಿಗೆಯಲ್ಲಿ ತುಳಸಿ ಗಿಡವನ್ನು ನೇರ ಬಿಸಿಲಿನಿಂದ ದೂರ ಇಟ್ಟು ನೆರಳಿನಲ್ಲಿಡುವುದು ಮುಖ್ಯ. ಜೊತೆಗೆ ಹಳದಿ ಎಲೆಗಳನ್ನು ತೆಗೆಯುವುದು, ಕೊಂಬೆಗಳನ್ನು ಕತ್ತರಿಸುವುದು ಮತ್ತು ಮಣ್ಣಿನ ಮೇಲೆ ಒಣ ಎಲೆಗಳು ಅಥವಾ ತೆಂಗಿನ ಸಿಪ್ಪೆ ಹಾಸುವುದರಿಂದ ತೇವಾಂಶ ಉಳಿಯುತ್ತದೆ. ಈ ಕ್ರಮಗಳನ್ನು ಪಾಲಿಸಿದರೆ ಬೇಸಿಗೆಯಲ್ಲೂ ತುಳಸಿ ಗಿಡವನ್ನು ಆರೋಗ್ಯಕರವಾಗಿ ಉಳಿಸಿಕೊಳ್ಳಬಹುದು ಎಂದು ತಜ್ಞರು ಸಲಹೆ ನೀಡಿದ್ದಾರೆ.

ತಕ್ಷಣ ನಿಮ್ಮ ಜಿಲ್ಲೆಯ ತಾಜಾ ಸುದ್ಧಿಗಳನ್ನು ಓದಲು ಮತ್ತು ವೀಕ್ಷಿಸಲು ಕೆಳಗಿನ👇🏻 ವಾಟ್ಸಪ್ ಮತ್ತು ಟೆಲಿಗ್ರಾಂ ಗ್ರೂಪ್‌ಗಳನ್ನು ಬಳಸಿ.

Join WhatsApp Group